सूचना विभाग 
सूचना विभाग
काठमाडौं। राष्ट्रिय जनसमृद्धि पार्टी नेपालले आफ्नो नयाँ प्रचार गीत “समृद्धिको बाटो” औपचारिक रूपमा सार्वजनिक गरेको छ। पार्टीको प्रेस तथा प्रचार विभागका अनुसार, यो गीतले नेपालका सामान्य नागरिकदेखि किसान, मजदुर, विद्यार्थी तथा युवाहरूको साझा भावना र राष्ट्रिय समृद्धिको सामूहिक आकांक्षा उजागर गर्छ।
गीतका शब्द माधव मरासिनीले लेखेका हुन्। उनका अनुसार “समृद्धिको बाटो” केवल सांगीतिक सिर्जना मात्र होइन, एक राष्ट्रिय अभियान र जनताको आवाज हो, जसले पारदर्शी शासन, इमानदार नेतृत्व, समान अधिकार र जनसहभागितामार्फत समृद्ध नेपाल निर्माणको संदेश दिन्छ। “भ्रष्टाचार टाढा, पारदर्शी शासन, इमानदार नेताको यो हो पहिचान” जस्ता पंक्तिहरूले पार्टीको नीति–दृष्टिकोण स्पष्ट रूपमा झल्काउँछन्।
राष्ट्रिय जनसमृद्धि पार्टीका अनुसार, यो गीत आगामी सबै सभा–सम्मेलन, जनसम्पर्क कार्यक्रम र अभियानहरूमा बजाइनेछ। गीतले देशभरका सदस्य र समर्थकहरूलाई उर्जाशील बनाउने, राष्ट्रनिर्माणको यात्रामा एकजुट हुन प्रेरित गर्ने र “समृद्ध नेपाल निर्माण” अभियानलाई थप तीव्रता दिने अपेक्षा गरिएको छ।
प्रचार गीतमा राष्ट्र, जनता र समृद्धिलाई अभियानको मुख्य आधारका रूपमा प्रस्तुत गरिएको छ। किसान, मजदुर, विद्यार्थीदेखि सर्वसाधारण सबैको आवाज समेटिएको यस गीतले समान अधिकार र न्यायपूर्ण समाज निर्माणको पक्षमा दृढता व्यक्त गर्छ।
गीतको अन्त्यमा रहेको उद्गार “जय नेपाल ! जय जनसमृद्धि !” ले राष्ट्रियता, जनअभियान र समृद्ध भविष्यप्रतिको विश्वासलाई थप प्रगाढ बनाएको पार्टीको भनाइ छ।
सूचना विभाग 